भिवंडी : राज्यात अतिसंवेदनशील म्हणून ओळखल्या जाणाऱ्या ठाणे जिल्ह्यातील भिवंडी तालुक्यातील कारीवली गावच्या हद्दीत असलेल्या एका खदानीच्या बाजूला असलेल्या कार्यालयात जिलेटिनच्या अवैध साठ्यावर ठाणे गुन्हे शाखेच्या पोलिसांनी धाड टाकून या ठिकाणाहून सुमारे 12 हजार जिलेटीन च्या कांड्या जप्त केल्या आहेत याप्रकरणी भोईवाडा पोलीस ठाण्यात गुन्हा दाखल करून पोलिसांनी एका इसमाला अटक केली आहे पोलिसांनी केलेल्या या धाडसी कारवाईमुळे भिवंडीत खळबळ माजली आहे.
गुरुनाथ काशिनाथ म्हात्रे ( वय 53 रा. कालवार,भिवंडी ) असे अवैध जिलेटीन साठा केल्या प्रकरणी अटक केलेल्या
इसमाचे नाव असून त्याने आपल्या भिवंडीतील कारीवली गांव येथील महेश स्टोन या खडी मशीन नजीकच्या
चाळीत असलेल्या कार्यालयाच्या स्टोअर रूम मध्ये मानवी जिवीतास धोका निर्माण होईल हे माहित असतांनाही सोलर इंडस्ट्रीज कंपनीचे 25 किलो वजनाचे एकुण 60 बॉक्स त्यात एकुण 11 हजार 400 जिलेटिन स्फोटक पदार्थाच्या कांडया ज्यांचे एकूण वजन दीड टन असून डेक्कन पॉवर कंपनीचे 03 बॉक्स त्या प्रत्येक बॉक्समध्ये 200 जिलेटिन स्फोटक पदार्थाच्या कांडया अशा एकुण 600 जिलेटिन स्फोटक पदार्थाच्या कांडया ज्यांचे एकुण वजन 75 किलो अशा एकुण 12 हजार जिलेटिन स्फोटक पदार्थाच्या कांडया व सोलर कंपनीचे 2508 इलेक्ट्रीक डेटोनेटर व डेक्कन कंपनीचे 500 इलेक्ट्रीक डेटोनेटर असे एकुण 3008 इलेक्ट्रीक डेटोनेटर असा मोठया प्रमाणात जिलेटीन व इलेक्ट्रीक डेटोनेटर असा एकुण 2 लाख 7 हजार रुपये किंमतीचा स्फोटक पदार्थांचा साठा विना परवाना व बेकायदेशीरित्या साठविला असल्याचे आढळून आला आहे.या अवैध जिलेटीन साठ्याबाबत ठाणे गुन्हे शाखेच्या युनिट एक च्या पोलीस अधिकाऱ्यांना माहिती मिळताच त्यांनी याठिकाणी छापा टाकून अवैध जिलेटीन साठा जप्त केला आहे. याप्रकरणी भोईवाडा पोलीस ठाण्यात गुन्हा दाखल केला असून आरोपीस सायंकाळी भिवंडी न्यायालयात हजर केले असता त्यास 22 मे पर्यंत पोलीस कोठडी ठोठावण्यात आली असून गुन्ह्याचा पुढील तपास ठाणे गुन्हे युनिट एकचे सहाय्यक पोलीस निरीक्षक प्रफुल्ल जाधव करीत आहेत. दरम्यान घटनास्थळी ठाणे गुन्हे शाखेचे पोलीस उपायुक्त लक्ष्मीकात पाटील, भिवंडीचे पोलीस उपायुक्त योगेश चव्हाण, भोईवाडा पोलीस ठाण्याचे वरिष्ठ पोलीस निरीक्षक एस ए इंदलकर,गुन्हे शाखेचे अशोक होनमाने या अधिकाऱ्यांनी भेट देऊन पाहणी केली आहे.
